Azərbaycan innovasiya sahəsində “Ən böyük qlobal irəliləyiş” mükafatına layiq görüldü

Azərbaycan nüfuzlu reytinqdə Mərkəzi Asiya üzrə “Ən böyük qlobal irəliləyiş” mükafatına layiq görülüb

Ulusum.az xəbər verir ki, innovasiya iqtisadiyyatı üzrə araşdırma platforması olan “StartupBlink” 2025-ci il üçün “Startup Ecosystem Awards” reytinqinin nəticələrini açıqlayıb. Reytinqə əsasən, Azərbaycan Mərkəzi Asiya üzrə “Ən böyük qlobal irəliləyiş” mükafatını qazanıb.

Bu uğur, Azərbaycanın 6 pillə irəliləməsi və regionda ən yüksək göstəriciyə nail olması ilə izah olunur. Mükafat ölkənin innovasiya siyasətinin operatoru olan İnnovasiya və Rəqəmsal İnkişaf Agentliyinə (İRİA) təqdim edilib.

“StartupBlink” hesabatında qeyd olunub ki, İRİA-nın fəaliyyəti nəticəsində innovasiya infrastrukturu və startap siyasəti ciddi şəkildə inkişaf edib. Agentliyin bu sahədə liderliyi və dayanıqlı startap ekosistemi yaratmaq istiqamətində atdığı addımlar xüsusi vurğulanıb.

Qeyd edək ki, builki reytinqdə 18 ölkədən 22 ekosistem 40 müxtəlif parametr üzrə dəyərləndirilərək mükafatlandırılıb.

R.Daşdəmirova