Sabunçu Tibb Mərkəzində endoprotez əməliyyatlarının icrasına başlanıldı

TƏBİB-in tabeliyində endoprotez əməliyyatları icra olunan tibb müəssisələrinin sayı 10-a çatıb.

Sabunçu Tibb Mərkəzində endoprotez əməliyyatlarının icrasına başlanılıb. Endoprotez əməliyyatları həyata keçirilən TƏBİB-in tabeliyində olan tibb müəssisələrinin sayı bununla 10-a çatıb. Hazırda bu əməliyyatların aparıldığı müəssisələrin sayının artırılması istiqamətində işlər davam etdirilir. Məqsəd vətəndaşlara göstərilən tibbi xidmətlərin keyfiyyətinin yüksəldilməsidir.

Bu gündən etibarən Sabunçu Tibb Mərkəzində də endoprotez əməliyyatları uğurla icra olunur. Mərkəzdə ilk belə əməliyyat uğurla tamamlanıb. Əməliyyat 66 yaşlı pasiyent üzərində həyata keçirilib. Pasiyent bud–çanaq oynağının total artroplastikası əməliyyatını icbari tibbi sığorta çərçivəsində alıb.

O, yıxılma nəticəsində sağ bud sümüyünün boyun sınığı diaqnozu ilə tibb mərkəzinə müraciət etmişdi. Müayinələrdən sonra pasiyentə sağ bud sümüyü boynunun subkapital sınığı diaqnozu qoyulub və əməliyyat qərarı verilib.

Cərrahi müdaxilə Travmatologiya–ortopediya şöbəsinin müdiri, ortoped–travmatoloq Turan İskəndərzadə tərəfindən həyata keçirilib. Hazırda pasiyentin vəziyyəti stabildir və müalicəsi davam etdirilir.

Ulusum.az / R.Daşdəmirova