"Pensiya yaşına çatan vəkil layiqli həyat səviyyəsini təmin etməkdə çətinlik çəkir" - Deputat

"Dövlət büdcəsini formalaşdırarkən bir məsələyə xüsusi diqqət yetirmək lazımdır. Hazırkı qanunvericilik məhkəmə hakimləri, prokurorluq və digər orqan əməkdaşları üçün pensiya güzəştlərini nəzərdə tutur.

Təbii ki, hüquq-mühafizə orqanlarının xüsusi statusu olan şəxslərin təminat məsələsi daim diqqətdə saxlanmalıdır. Lakin hüquq-müdafiə fəaliyyətini həyata keçirilməsinin bütün mərhələlərində iştirak edən vəkillərlə bağlı heç bir xüsusi qayda mövcud deyil".

Ulusum.az xəbər verir ki, bunu deputat Bəhruz Məhərrəmov Milli Məclisdə müzakirələr zamanı bildirdi.

Onun sözlərinə görə, vəkillərin vergi və digər icbari ödənişləri hakimlər, prokuror və müstəntiqlərlə müqayisədə xeyli artıqdır.

"Nəzərə almaq lazımdır ki, vergilər və digər məcburi ödənişlər daxil olmaqla vəkil dövlət hesabına çıxdığı işlərdə saatına cəmi 11 manat alır. Realda isə vəkilə çatan vəsaitin vəsait yeddi manata yaxındır. Vəkillərin pensiya kapitalı da sabit əməkhaqqı əsasında deyil, yalnız qonorarlardan formalaşır və bu gəlirlərdən çoxlu tutulmalar edildiyi üçün uzun illər ərzində fəaliyyət göstərən vəkillərin pensiya kapitalı yetərincə yığılmır. Pensiya yaşına çatan vəkil layiqli həyat səviyyəsini təmin etməkdə çətinlik çəkir. Bu səbəbdən vəkillərin pensiya təminatının yaxşılaşdırılması üçün müvafiq dəyişikliklərin, müvafiq addımların atılmasına ciddi ehtiyac var".

R.Daşdəmirova