"Az sayda şagird üçün 11 illik məktəb saxlamaq səmərəsizdir" - AÇIQLAMA

Elm və təhsil naziri Emin Əmrullayev açıqlamasında bildirib ki, şagird sayı çox az olan bəzi kənd məktəblərinin fəaliyyəti dayandırılacaq. Həmin məktəblərdə çalışan müəllimlər və təhsil alan şagirdlər isə onlara daha yaxın ərazidə yerləşən digər məktəblərə yönləndiriləcək

Təhsil eksperti Elçin Süleymanov ulusum.az-a açıqlamasında bildirib ki, bu proses yeni deyil və məqsəd dövlət vəsaitlərinin səmərəli istifadəsi, eləcə də şagirdlər üçün daha real məktəb mühitinin yaradılmasıdır.

Onun sözlərinə görə, üç-beş şagirdi olan məktəbi ayrıca saxlamaq həm çətin, həm də səmərəsizdir. Daha mərkəzi və yaxşı infrastrukturlu məktəb əsas məktəb seçilir, digər kəndlərin şagirdləri isə ora nəqliyyatla daşınır.

Ekspert əlavə edib ki, bu model həm maliyyəyə qənaət edir, həm də böyük məktəblərdə nizam-intizam və sosiallaşma daha güclü olur. Azsaylı siniflərdə müxtəlif yaşların birləşdirilməsi təhsilin keyfiyyətini aşağı saldığı üçün kompleksləşdirmə müsbət addım sayılır.

Süleymanovun vurğuladığı əsas şərt isə şagirdlərin rahat daşınması, nəqliyyatın təmin edilməsi və valideyn yükünün azaldılmasıdır.
Daşımanın təşkili, nəqliyyat vasitələrinin ayrılması və valideynlərin üzərinə düşən yükün azaldılması təmin edilməlidir".

Ulusum.az