Tramp və Si arasında kritik görüş: Yeni Soyuq Müharibədə atəşkəs?

ABŞ Prezidenti Donald Tramp Çinin Sədri Si Tszinpinlə ikinci prezidentlik müddətində ilk dəfə görüş keçirir.

Görüş ABŞ-Çin münasibətlərində gərginliyin fonunda baş tutur: ticarət müharibəsi, Tayvan məsələsi və Pekinin Rusiya ilə yaxınlaşması Vaşinqton-Pekin xəttində dərin çatlar yaradıb.

Ekspertlər bildirirlər ki, bu görüşdən böyük irəliləyiş gözlənilmir. Tərəflər sadəcə yeni bir "soyuq müharibə" şəraitində gərginliyin azaldılmasına çalışacaqlar. Nə Tramp, nə də Si hegemonluq yarışında geri çəkilməyə hazırdır.

Çin son illər ərzində texnologiya sahəsində özünü təmin etməyə yönəlib, avtomobil istehsalında dünya lideri olub və Rusiya ilə "sərhədsiz dostluq" elan edib. BRICS+ formatında isə yeni antiqərb koalisiyası formalaşdırır.

Tramp isə hakimiyyətə qayıtdıqdan sonra Çinə qarşı əvvəlki sərt ticarət siyasətini yenidən tətbiq etməyə cəhd edib. Lakin Çin cavab tədbirləri ilə bu hücumları neytrallaşdıra bilib. ABŞ Prezidenti artıq iki dəfə ticarət müharibəsində atəşkəs elan edib.


Cümə axşamı Cənubi Koreyada keçiriləcək sammitdə Trampın Çin mallarına qarşı yeni gömrük rüsumlarını 145%-ə qədər artırmaq planını növbəti dəfə təxirə salacağı gözlənilir. Bu da danışıqların əsas nəticələrindən biri ola bilər.



Ulusum.az