12 oktyabr 2020 – Vətən Müharibəsinin 16-cı günü

2020-ci ilin 27 sentyabrında Ermənistanın təxribatlarına cavab olaraq Azərbaycan Ordusunun başlatdığı Vətən müharibəsinin bu günü də tarixi əhəmiyyət daşıyır. Əməliyyatların 16-cı günü – 12 oktyabr 2020-ci ildə cəbhənin bir neçə istiqamətində düşmənə ağır zərbələr endirilib.

Azərbaycan Ordusu tərəfindən düşmənin 3 ədəd “Qrad” yaylım atəş sistemi, 1 ədəd T-72 tankı və bir neçə avtomobil texnikası məhv edilib. Hadrut istiqamətində Ermənistanın 9-cu alayının artilleriya bölməsi geri çəkilməyə məcbur qalıb, 5-ci taborun şəxsi heyəti isə döyüş mövqelərini tərk edərək silah-sursat və texnikanı atıb qaçıb. Qırmızı Bazar istiqamətində isə düşmənin yeraltı sığınacağı dəqiq artilleriya zərbəsi ilə darmadağın edilib.

Ulusum.az xəbər verir ki. Baş Prokurorluğun açıqlamasına əsasən, Ermənistan ordusunun yaşayış məntəqələrinə artilleriya və raket hücumları nəticəsində sentyabrın 27-dən oktyabrın 12-si saat 12:00-a qədər 41 mülki şəxs həlak olub, 207 nəfər xəsarət alıb. Bundan əlavə, 1185 ev, 57 çoxmənzilli bina və 148 mülki obyekt ziyan görüb.

Bu gün haqq savaşımızın 16-cı günü kimi yaddaşlara yazılıb.