İngiltərə universitetlərində ChatGPT həyəcanı

İngiltərə universitetlərində süni intellekt əsaslı proqramlardan istifadə akademik etika ilə bağlı ciddi müzakirələrə səbəb olub. The Times qəzetinin yayımladığı məlumata görə, 2023–2024-cü tədris ilində təxminən 7 min tələbə ChatGPT və ona bənzər süni intellekt alətləri vasitəsilə kopya çəkməkdə şübhəli bilinib.

Halbuki 2022-ci ildə bu cür halların sayı cəmi 50 idi. Lakin son iki ildə bu göstərici sürətlə artaraq minlərlə vakaya çatıb. Xüsusilə Kent Universitetində 1000-dən çox, Essex Universitetində 690, Sheffield Universitetində 585, King’s College Londonda isə 344 şübhəli iş aşkarlanıb.

Universitetlər bu vəziyyətə cavab olaraq süni intellektin istifadəsini ya tamamilə qadağan edir, ya da çox ciddi qaydalarla məhdudlaşdırır. Tələbələrin ev tapşırıqlarında süni intellektdən yararlanması akademik dürüstlüyə zərbə kimi qiymətləndirilir.

Bununla belə, bəzi akademiklər süni intellektin tamamilə rədd edilməsinin düzgün olmadığını düşünür və etik istifadə qaydalarının hazırlanmasının vacibliyini vurğulayırlar. Ancaq mövcud şəraitdə bir çox təhsil müəssisəsi ev tapşırıqlarına nəzarəti sərtləşdirir və intizam tədbirlərini gücləndirir.

İngiltərədəki bu gedişat, süni intellekt dövründə akademik dürüstlüyü necə qorumaq və təhsil sistemlərinin gələcəyi ilə bağlı ciddi suallar doğurur.

Ulusum.az