ABŞ yardımı dayandırsa Ukraynada daxili böhran yarana bilər

Rusiya atəşkəsin əldə olunması üçün lazım olan tələbləri əsasən Ukraynaya yox, ABŞ-a irəli sürür. Bu barədə “Lenta.ru”ya politoloq Yevgeni Kopaçko məlumat verib.

O bildirib ki, Moskvadan Kiyevə ötürülən və münaqişənin sonlandırılması ilə bağlı mövqeni əks etdirən memorandum iki variant təklif edir. Birincisi — Ukrayna Silahlı Qüvvələrinin dörd bölgədən çıxarılması. İkincisi — mövcud cəbhə xətti üzrə münaqişənin dondurulması və Ukrayna hökumətinin səfərbərliyi dayandıraraq Qərbdən yeni hərbi yardımdan imtina etməsi.

“Belə zəmanətləri yalnız Qərb verə bilər. Yalnız ABŞ Avropaya təzyiq göstərə bilər ki, bu yardımlar həqiqətən dayandırılsın,” — deyə Kopaçko vurğulayıb.

Politoloqun fikrincə, Vaşinqton bu şərtlərlə razılaşaraq eskalasiyanın qarşısını ala bilər və Qərbin açıq müharibəyə sürüklənməsinə imkan verməzdi. Amma ekspertə görə, hazırda bu real görünmür.

“Təsəvvür edin, Ukraynada yardım dayansa, ölkə daxilində nə qədər ciddi böhranlar yaranar və hakimiyyət bunun öhdəsindən gələ bilməz. ABŞ bu addımlara hələ hazır deyil,” — deyə o əlavə edib.

Xatırladaq ki, dünən Ukrayna Prezidenti Volodimir Zelenski ABŞ-ın Kiyevə dəstək məsələsində “güclü addımlar” atmamasından şikayətlənmişdi.

Ulusum.az