Ukrayna Atəşkəs Memorandumunu Açıqladı – Rusiya ilə Sülh, Amma Şərtlərlə

Reuters agentliyinin yaydığı məlumata görə, Ukrayna tərəfi 2 iyun tarixində İstanbulda Rusiya nümayəndə heyəti ilə keçiriləcək danışıqlarda təqdim etmək məqsədilə atəşkəsə dair tam memorandum hazırlayıb.

Memorandumda havada, quruda və dənizdə tam və qeyd-şərtsiz atəşkəsin tətbiqi təklif olunur. Bu, gələcək sülh danışıqları üçün ilkin şərt kimi təqdim edilir.

Etimadın möhkəmləndirilməsi məqsədilə tərəflərə “hamının hamıya” prinsipi üzrə əsir mübadiləsi aparmaq təklif olunur.

Sənəddə eyni zamanda “təkrar təcavüzün qarşısının alınması” məqsədilə “dayanıqlı sülh və təhlükəsizliyin daimi əsasının” bərpası, Ukraynaya təhlükəsizlik zəmanətləri və beynəlxalq ictimaiyyətin danışıqlarda iştirakının vacibliyi vurğulanır.

Memorandumda qeyd olunur ki, Kiyev neytrallıq statusundan imtina edir. Ukraynanın Avropa İttifaqına, eləcə də NATO-ya üzv olmaq ehtimalı açıq saxlanılır – bu, alyans daxilində konsensusa bağlı olacaq.

Sənəddə 2014-cü ilin fevral ayından sonra itirilmiş ərazilər üzərində Rusiyanın nəzarətinin beynəlxalq səviyyədə tanınmayacağı bildirilir. Hazırkı təmas xətti danışıqlar üçün başlanğıc nöqtəsi hesab olunur. Bütün ərazi məsələləri yalnız atəşkəs tam təmin olunduqdan sonra müzakirəyə çıxarılacaq.

Bundan başqa, memorandum Rusiyaya qarşı tətbiq edilən sanksiyaların mərhələli şəkildə qismən ləğv olunmasını, eyni zamanda bu məhdudiyyətlərin yenidən tətbiq oluna bilməsi ehtimalını da nəzərdə tutur.

Sonda sənəddə iki ölkənin liderlərinin görüşərək sülh sazişinin əsas məqamlarını birbaşa razılaşdırmasının vacibliyi qeyd olunur.

Qeyd edək ki, daha əvvəl məlumat verilmişdi: Rusiya nümayəndə heyəti 2 iyun tarixində İstanbulda keçiriləcək danışıqlarda iştirak etmək üçün yola düşüb.

Ulusum.az