ÜST-dən Təcili Çağırış: Ətirli Tütün Gəncləri Asılılığa Aparır

Ümumdünya Səhiyyə Təşkilatının (ÜST) baş direktoru Tedros Adhanom Qebreyesus tütün məmulatlarında ətirli maddələrin dərhal qadağan edilməsinə çağırıb. Bu barədə təşkilatın rəsmi saytında məlumat verilib.

Onun sözlərinə görə, belə bir qərar gəncləri yeni asılılıq dalğasından qorumaq üçün vacibdir:

“Onlar tütünə qarşı onilliklər ərzində əldə olunmuş irəliləyişi puç edə bilər. Qəti tədbirlər görülməzsə, hər il təxminən səkkiz milyon insanın ölümünə səbəb olan qlobal tütün epidemiyası davam edəcək. Bu da məhz cəlbedici ətirli qatqılar sayəsində mümkün olacaq,” – deyə Qebreyesus bildirib.

ÜST qeyd edir ki, ətirli maddələr tütünün xoşagəlməz dad və qoxusunu yumşaldaraq uşaqlar üçün onu daha cəlbedici edir. Xoş ətirlərlə maskalanmış toksinlər zərərli vərdişdən imtinanı çətinləşdirir və ciddi tənəffüs xəstəlikləri riskini artırır.

Məlumata görə, bu gün 50-dən çox ölkədə ətirli tütün məhsulları qadağandır. 40-dan çox ölkə isə elektron siqaretlərin satışını yasaqlayıb. Lakin bir çox ölkədə ətirli aksessuarların satışına hələ də nəzarət edilmir.

Ulusum.az