Ermənistan, ABŞ və Fransa 2023-2024-cü maliyyə ilində Hindistanın müdafiə məhsullarının ən böyük idxalçısı olublar

Ermənistan, ABŞ və Fransa 2023-2024-cü maliyyə ilində Hindistanın müdafiə məhsullarının ən böyük idxalçısı oldular. Bu barədə The Times of India qəzeti mənbələrə istinadən yazır.

Məlumata görə, Hindistanın dövlət və özəl şirkətləri 100-ə yaxın ölkəyə geniş çeşiddə silah, sursat və komponentlər ixrac edir. Son bir ildə satışlar 2,6 milyard dollar təşkil edib.

Nəşrin yazdığına görə, Ermənistan son dörd il ərzində Hindistanla raketlər, artilleriya qurğuları, raket sistemləri, radarlar, zirehlər və gecəgörmə cihazları, eləcə də geniş çeşiddə sursat və artilleriya mərmilərinin idxalı üçün bir neçə müqavilə bağlayıb. Ermənistan Hindistan istehsalı olan “Akaş” hava hücumundan müdafiə raketlərinin ilk xarici alıcısı olub.

ABŞ-a ixrac əsasən qlobal təchizat zəncirlərinin və kompensasiya öhdəliklərinin bir hissəsi kimi Hindistandan təyyarə və helikopterlərin gövdəsi, qanadları və digər hissələrini alan Boeing və Lockheed Martin kimi qlobal müdafiə nəhəngləri də daxil olmaqla, alt sistemlərdən və komponentlərdən ibarətdir.

“Fransa da öz növbəsində çoxlu proqram təminatı və elektron avadanlıq idxal edir”, - mənbə bildirib.

Eltun Məmmədov