Cənub istiqamətinə sərnişindaşıma nə vaxtdan bərpa olunacaq? ADY-dən AÇIQLAMA EKSKLÜZİV

Dəmiryolu xəttində olan problemlərə görə cənub istiqamətində bir müddətdir ki, sərnişindaşımalar təxirə salınıb.

Ulusum.az xəbər verir ki, məsələ ilə bağlı “Azərbaycan Dəmir Yolları” QSC (ADY) ilə əlaqə saxladıq. Qurumdan verilən məlumata görə, hazırda infrastruktur işləri aparılır. Qurumun mətbuat xidmətinin Ulusum.az-ın sorğusuna cavabı:

“Azərbaycan Dəmir Yolları ölkədə mərhələli şəkildə dəmir yolu infrastrukturunun sağlamlaşdırılması işlərini davam etdirir.

Belə ki, mərhələli şəkildə Bakıətrafı ərazilərdə istismar müddəti bitmiş yollar əsaslı təmir olunur, eləcə də Şimal-Cənub nəqliyyat dəhlizinin bir hissəsi olan Sumqayıt-Yalama ikixətli dəmir yolu xətti yenidən qurulur.

İşğaldan azad olunmuş Qarabağ və Şərqi Zəngəzurdakı Horadiz-Ağbənd və Bərdə-Ağdam dəmir yolu xətlərində də yenidənqurma işləri yüksək templə icra edilir.

Cənub istiqamətində sərnişindaşımanın bərpa olunması üçün ilk növbədə dəmir yolu infrastrukturu (dəmir yolu xətti, kontakt şəbəkəsi, rabitə-işarəvermə qurğuları, platformalar və s.) yenidən qurulmalıdır. Bu istiqamətdə yenidənqurma işlərinə vəsait ayrıldığı təqdirdə ictimaiyyətə əlavə məlumat veriləcək”.

Ağa Dadaşzadə