Qusar rayonunda notariat seminarı keçirilib

Qusar rayonunda notariat seminarı keçirilib

2025-ci il iyulun 5-də Qusar rayonunda Azərbaycan Notariat Palatasının təşkilatçılığı ilə "Hüquqi şəxslərin iştirakı ilə aparılan notariat hərəkətlərinin xüsusiyyətləri" mövzusunda regional seminar keçirilib.

Tədbirdə hüquqi şəxslərlə bağlı notariat əməliyyatlarının hüquqi çərçivəsi və praktiki məsələləri müzakirə olunub.

Seminarda Azərbaycan Notariat Palatasının sədri Hüseyn Məmmədov, Ədliyyə Nazirliyinin Notariat, qeydiyyat və reyestr baş idarəsinin böyük məsləhətçisi Müşfiq Cəfərov və digər mütəxəssislər çıxış edərək, hüquqi şəxslərin təsis paylarının özgəninkiləşdirilməsi, benefisiar mülkiyyətçinin müəyyən edilməsi və aktivlərin qiymətləndirilməsi kimi mövzularda təqdimatlar ediblər.

Seminar hibrid formatda təşkil olunub və 140-a yaxın notariusun iştirakı ilə keçirilib.
Tədbir zamanı notariat əməliyyatlarının təkmilləşdirilməsi və hüquqi çərçivənin inkişafı ilə bağlı təkliflər irəli sürülüb.

R.İkramlı
Ulusum.az