“Milli komandada seçmə mərhələsini adlaya BİLMƏDİK" - EKSKLÜZİV

"Daima inkişaf etməyə çalışırıq".

Bu sözləri ULUSUM.az saytına açıqlamasında qadın həndbolçulardan ibarət Azərbaycan millisinin üzvü Səkinə Musayeva deyib. Onun sözlərinə görə, hazırda həndbol inkişaf mərhələsinə qədəm qoyub:

“Biz yerli çempionatla yanaşı, müxtəlif yarışlarda da iştirak edirik. İnkişaf gedir, ən gözəl inkişaf oyun təcrübəsi ilə qazanılır. Hazırda Azərbaycanda Çempionatında əsas 2 rəqibimiz var, ancaq güclü komandaların sayı artsa daha yaxşı olar”.

Səkinə Musayeva milli komandadan da danışıb: “Milli komanda olaraq təəssüf ki, seçmə mərhələni adlaya bilmədik. Üzərimizdə daha çox işləməliyik, daha çox yarışlardan iştirak etməliyik. Ümumiyyətlə, ölkə həndbolunda böyük bir strategiya qurmalıyıq. Eyni zamanda uşaq həndboluna da ciddi önəm verməliyik. Uşaq həndbolunun inkişafı sabah üçün baza deməkdir. Respublika üzrə həndbola maraq artırılmalıdır ki, daha çox uşaq bu idman növünə maraq göstərsin”.

S.Musayeva həmçinin qeyd edib ki, həndbol üzrə daha çox oyun keçirilməlidir. Çünki bu, inkişafa təkan verən əsas amillərdən biridir.

Ağa Dadaşzadə