"Bitki sağlamlığı" qanun layihəsi müzakirədə

Azərbaycan Respublikasının Qida Təhlükəsizliyi Agentliyi (AQTA) tərəfindən hazırlanan yeni "Bitki sağlamlığı haqqında" qanun layihəsi üzrə ictimai müzakirələr davam edir.

Aprelin 15-də Bitki Mühafizə Vasitələri, Gübrə İstehsalçıları və İdxalçıları Assosiasiyası ilə, aprelin 16-da isə Meyvə-Tərəvəz İstehsalçıları və İxracatçıları Assosiasiyası ilə müzakirələr keçiriləcək.

Qanun layihəsi 10 fəsil və 46 maddədən ibarət olub, bitki və bitkiçilik məhsullarının istehsalı, emalı, idxalı və ixracı ilə bağlı hüquqi əsasları müəyyən edir, həmçinin bitki mühafizə vasitələrinin və aqrokimyəvi maddələrin dövriyyəsini tənzimləyir.

Müzakirələrin məqsədi qanunvericiliyi beynəlxalq tələblərə uyğunlaşdırmaq və bitki sağlamlığının təmin edilməsi sahəsində fəaliyyət göstərən subyektlər arasındakı münasibətləri tənzimləməkdir.