Repetitorlar vergi ödəsinlər - ÇAĞIRIŞ

"Yaxın müddətdə repetitorluğu Azərbaycan təhsilindən kənarda təsəvvür etmək mümkün deyil. Repetitorlar adətən təhsil sahəsində özünü müəyyən qədər sübut etmiş, biliyi, bacarığı, təcrübəsi olan şəxslərdir".

Ulusum.az xəbər verir ki, bu fikirləri Redaktor.az-a təhsil eksperti Məzahir Məmmədli repetitorların sertifikasiyadan keçməsi və vergiyə cəlb edilməsi barədə təklifdən danışarkən bildirdi.

Onun fikrincə, repetitorların sertifikasiyadan keçməsinə ehtiyac yoxdur:

"Onsuz da hamısı müəllimdir deyə sertifikasiyadan keçiblər. Valideynlər həmin repetitorların yanına uşaqları göndərirlər ki, onların artıq təcrübəsi təsdiqini tapıb. Yəni qəbul nəticələrinə görə valideynlər seçim edirlər".



Müsahibimiz repetitorların vergi ödəməsi məsələsinə də toxundu:

"Əlbəttə ki, bu, repetitorların özlərinə sərf edir ki, əgər bu işlərini qanuniləşdirsələr, vergi ödəsələr, rəsmi qeydiyyatdan keçsələr, daha yaxşı olar. Necə ki, bu gün Azərbaycanda fəaliyyət göstərən böyük kurslar belədir: həm repetitorluqla məşğuldurlar, həm də müəyyən qədər rəsmiləşirlər, vergi ödəyirlər və azad şəkildə fəaliyyət göstərə bilirlər. Mən düşünürəm ki, hər bir fərd özü belə bir təşəbbüs etsə, daha çox özünə faydası olacaq. Çünki onun artıq fəaliyyətini, əməyini heç kim şübhə altına almayacaq".

R.Daşdəmirova