"Ermənistan nümayəndələrinin Bakıda olmasına normal baxıram" - Millət vəkili

"Azərbaycanla Ermənistan arasındakı münasibətlər artıq normal qonşuluq münasibətlərinə doğru gedir.
Ermənistan 8 avqust tarixində Vaşinqtonda imzalanan üçtərəfli bəyanatda Azərbaycanın ərazi bütövlüyünü tanıdığını qeyd edir və sülh müqaviləsi paraflanıb. Əgər Ermənistan öz konstitusiyasında Azərbaycana ərazi iddiası müddəasını çıxardarsa, qısa zamanda sülh müqaviləsi bağlana bilər. Belə bir şəraitdə artıq xalq diplomatiyasının işləməsi olduqca vacibdir".

Ulusum.az xəbər verir ki, bu fikirləri Redaktor.az-a Milli Məclisin deputatı Aydın Mirzəzadə 21-22 noyabr 2025-ci il tarixlərində “Sülh Körpüsü” Təşəbbüsü çərçivəsində Ermənistan vətəndaş cəmiyyəti nümayəndələrindən ibarət qrupun Azərbaycana səfərindən danışarkən bildirdi.

"Azərbaycan nümayəndə heyəti İrəvanda, Ermənistanın QHT-ləri isə Bakıda olublar. Tərəflər bir-biri ilə geniş müzakirələr apardılar. QHT-lər vətəndaş cəmiyyətinin nümayəndələridir. Onlar vətəndaş cəmiyyətinin əhval-ruhiyyəsini bir-birinə çatdırmalı, vətəndaş cəmiyyəti ilə işləməlidirlər", - deyə o vurğuladı.

Millət vəkili hesab edir ki, qonşu dövlətlər ancaq sülh şəraitində yaşamalıdırlar:

"Bu baxımdan Ermənistan nümayəndələrinin Bakıda olmasına normal baxıram. Münasibətlərin inkişaf etməsi istiqamətində növbəti addım olaraq hesab edirəm ki, növbəti səfərlərdə artıq cəmiyyətin müxtəlif təbəqələrinin, o cümlədən deputat qruplarının, elm xadimlərinin, qadın və gənclər təşkilatlarının nümayəndələri də qarşılıqlı səfərlər edə bilərlər.
Bu səfərlər artıq iki dövlət arasında sülh müqaviləsinin imzalanmasına doğru yeni bir cəmiyyət tərəfindən dəstək olacaq. Azərbaycan Ermənistanla yaxşı münasibətlərə hazırdır.
Ermənistan 1988-2020-ci ildə olan dövrdən özü üçün nəticə çıxartmalıdır. Bu, baş verərsə, münasibətlərimiz möhkəmlənəcək və sülhün körpüsü dayanıqlı olacaqdır".

R.Daşdəmirova