Səhnənin Qəmlosu – Məlik Dadaşov 101 yaşında da unudulmur

Bu gün Azərbaycan teatr və kino sənətinin nəhəng simalarından biri – Xalq artisti Məlik Dadaşovun doğumundan 101 il ötür. 1924-cü ilin 7 iyun tarixində Bakıda dünyaya gələn sənətkar, ömrünün hər səhifəsini səhnəyə, sənətə və vətənə xidmətə həsr etdi.

İkinci Dünya müharibəsinin odlu-alovlu cəbhəsindən sağ qayıdan Dadaşov, aldığı beyin travmasına baxmayaraq, həyatını yenidən qurdu və 1945-ci ildə Gənc Tamaşaçılar Teatrında aktyor kimi fəaliyyətə başladı. 1950-ci ildən isə Akademik Dram Teatrının səhnəsində parladı.

O, elə bir dövrdə sənət yoluna qədəm qoydu ki, Ələkbərovlar, Məmmədovlar, İsgəndərovlarla bir səhnəni bölüşmək həm böyük məsuliyyət, həm də ilham idi. Bu mühit Məlik Dadaşovu təkcə aktyor yox, əsl səhnə fenomeninə çevirdi.

"Qəmlo" dedikdə göz önünə gələn sima, "Abbasqulu bəyin nazı ilə çox oynayırsan a..., Kərbəlayi!" replikası ilə yaddaşlara həkk olunan səs – bu, Məlik Dadaşov idi. “Axırıncı aşırım”dakı Qəmlo, “Fəryad”dakı dramatizm, “Atayevlər ailəsi”ndəki ağırlıq onun aktyorluq palitrasının zənginliyinin sübutudur.

Teatrda “Canlı meyit”, “On ikinci gecə”, “Sənsiz” kimi tamaşalarda yaratdığı obrazlar bu gün də unudulmur. Onun səsi, baxışı, mimikası, yaratdığı hər bir obrazla milyonlarla tamaşaçının yaddaşında iz buraxıb.

Ömrünün son illərində Rus Dram Teatrının direktoru kimi də fəaliyyət göstərən sənətkar, eyni zamanda gələcək aktyor nəsillərinə dərs deyərək təcrübəsini bölüşdü.

Azərbaycan aktyor sənətinin bu zirvəsi 1996-cı ilin dekabrında dünyasını dəyişsə də, yaratdığı sənət xəzinəsi ilə xalqının yaddaşında əbədiyaşardır.

Ulusum.az