Azərbaycanda 12 illik təhsil sisteminə keçidlə bağlı rəsmi açıqlama

Son günlər sosial şəbəkələrdə Azərbaycanda yeni dərs ilindən etibarən 12 illik təhsil sisteminə keçidlə bağlı məlumatlar yayılıb. Lakin Elm və Təhsil Nazirliyi bu məlumatlara aydınlıq gətirərək, gələn dərs ilindən 12-ci sinfin tətbiq olunacağı ilə bağlı yayılan xəbərlərin həqiqəti əks etdirmədiyini bildirib. Bu barədə APA məlumat yayıb.

Qeyd olunub ki, Azərbaycanda ümumi təhsil 12 ili əhatə edir (1 il + 11 il):

məktəbəqədər mərhələ (5 yaş),

ibtidai təhsil (1–4-cü siniflər),

ümumi orta təhsil (5–9-cu siniflər),

tam orta təhsil (10–11-ci siniflər).

"12 illik təhsil sisteminə keçid çoxşaxəli və mürəkkəb bir prosesdir. Elm və Təhsil Nazirliyinin məqsədi sadəcə təhsil müddətini artırmaq deyil, eyni zamanda beynəlxalq standartlara tam cavab verən keyfiyyətli təhsil mühiti yaratmaqdır", – deyə məlumatda qeyd olunub.

Ulusum.az