Məktəbdə cinayətlərin səbəbi: Günahkar kimdir?

Məktəbdə cinayətlərin səbəbi nədir?

Məktəbdə Cinayət: Tərbiyənin İflası və Cavabdehlik Kimindir?

Keçmiş millət vəkili, təhsil eksperti Ehtibar Əliyev məktəblərdə artan ağır cinayətlərin əsas səbəbini məktəbin tərbiyə funksiyasının zəifləməsi ilə əlaqələndirib. Onun sözlərinə görə, müəllimlər psixoloji və pedaqoji hazırlığa malikdir, lakin məktəbin tərbiyəvi rolu praktikada itməkdədir. Valideyn savadsız və ya hazırlıqsız ola bilər, amma bu, məktəbi məsuliyyətdən azad etmir.

Məktəb şagirdi təkcə öyrətməməli, həm də formalaşdırmalıdır.

Uşaqlar günün əsas hissəsini məktəbdə keçirdikləri üçün məktəb şagirdi təkcə öyrətməməli, həm də formalaşdırmalıdır. Təhlükəsiz və yönəldici mühit vacibdir. Valideyn-müəllim qarşıdurmaları isə bu prosesi zədələyir. Təhsil eksperti Ehtibar Əliyevə görə, bu problemlərin kökündə maliyyə yükü, qeyri-peşəkar rəhbərlik və informasiya xaosu dayanır.

Məktəbə bıçaqla gələn şagirdlər isə artıq təcili tədbirlər tələb edir:

1. Təhlükəsizlik sistemi gücləndirilməli, giriş-çıxış nəzarəti təmin edilməlidir.
2. Peşəkar psixoloq və sosial işçilər məktəblərdə fəaliyyət göstərməlidir.
3. Valideynlər maarifləndirilməli, məsuliyyət daşıdıqları unutdurulmamalıdır.
4. Agresiv kontentə çıxış məhdudlaşdırılmalı, sosial mediada nəzarət gücləndirilməlidir.

Ehtibar müəllimə görə, radikal tədbirlər əvəzinə yönləndirmə və sosial adaptasiya əsas yol olmalıdır. Amma hüquq çərçivəsində islaholunmaz halların qarşısı da alınmalıdır.

R.İkramlı
Ulusum.az