Azərbaycan və Macarıstan Baş Qərargah rəisləri hərbi obyektləri ziyarət ediblər

Azərbaycan Respublikasının müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev, ölkəmizdə rəsmi səfərdə olan Macarıstan Müdafiə Qüvvələrinin Baş Qərargah rəisi general Qabor Böröndinin rəhbərlik etdiyi nümayəndə heyəti ilə birgə Hərbi Hava Qüvvələrinin Mərkəzi Komanda Məntəqəsi, Kibertəhlükəsizlik Mərkəzi və komando hərbi hissələrindən birini ziyarət edib.



HHQ-nin Mərkəzi Komanda Məntəqəsində nümayəndələrə müasir texnologiyalarla təchiz edilmiş komanda məntəqəsinin strukturu və fəaliyyəti barədə məlumat verilib.



Kibertəhlükəsizlik Mərkəzində isə müasir kibertəhdidlərə qarşı süni intellekt əsaslı kibermüdafiə vasitələri barədə ətraflı məlumat təqdim olunub.


Komando hərbi hissəsində nümayəndə heyəti hərbi qulluqçuların fəaliyyətlərini izləyib və Azərbaycan Ordusunun istifadəsində olan silah-sursat, təchizat və döyüş texnikasından ibarət sərgi ilə tanış olub.