Heyvanlara Zorakılığa Görə Cərimələr Artırıldı

Azərbaycan Respublikasının İnzibati Xətalar Məcəlləsinə edilən son dəyişikliklərə əsasən, heyvanlarla rəhmsiz rəftar edən şəxslərə qarşı cərimələr artırılıb. Bu dəyişikliklər Prezident İlham Əliyev tərəfindən təsdiqlənib və 2024-cü ilin dekabrında qüvvəyə minib.

Əsas cərimə və tədbirlər aşağıdakılardır:

- Heyvanlara ağrı, əzab, işgəncə verilməsi, onların döyülməsi və ya döyüşdürülməsi hallarında fiziki şəxslər 500 manatdan 800 manatadək məbləğdə cərimə edilir.

- Əgər bu cür əməllər nümayişkaranə şəkildə, o cümlədən kütləvi informasiya vasitələrində nümayiş etdirilməklə törədilərsə, 800 manatdan 1 000 manatadək məbləğdə cərimə edilir.

- Heyvanlara qarşı rəhmsiz rəftar nəticəsində onların şikəst edilməsi halında 1 000 manatdan 1 500 manatadək məbləğdə cərimə tətbiq olunur.

- Heyvanların rəhmsiz rəftar nəticəsində tələf edilməsi halında isə 1 500 manatdan 2 000 manatadək məbləğdə cərimə edilir və ya bir ayadək inzibati həbs cəzası tətbiq oluna bilər.

- Heyvanlarla rəhmsiz rəftarın təbliğ edilməsi və ya bu cür rəftara açıq çağırışların edilməsi, həmçinin bu cür rəftarı özündə əks etdirən materialların kommersiya məqsədləri üçün istifadə edilməsi hallarında 1 000 manatdan 1 500 manatadək məbləğdə cərimə və ya bir ayadək inzibati həbs cəzası tətbiq olunur

Bu dəyişikliklər heyvan hüquqlarının qorunması və onlara qarşı rəhmsiz rəftarın qarşısının alınması məqsədilə həyata keçirilmişdir.


✍️"Ulusum".az