Skype fəaliyyətini dayandırır – bir dövr başa çatır

Uzaqları yaxın edən, illərlə insanların əlaqədə qalmasına vasitəçi olan məşhur ünsiyyət platforması Skype, rəsmi olaraq fəaliyyətini dayandırmağa hazırlaşır.

​Skype, 5 may 2025-ci il tarixində rəsmi olaraq fəaliyyətini dayandıracaq. Microsoft bu qərarı, daha müasir və inteqrasiya olunmuş ünsiyyət platforması olan Microsoft Teams-ə tam keçid strategiyasının bir hissəsi kimi açıqlayıb.

Skype, 2003-cü ildə istifadəyə verilmiş və qısa zamanda dünyada ən çox istifadə olunan videozəng və mesajlaşma vasitələrindən birinə çevrilmişdi. Azərbaycanda da Skype uzun müddət ailə üzvləri, dostlar və hətta distant dərslər və iş görüşmələri üçün əsas vasitələrdən biri olub.

Lakin texnologiyanın sürətli inkişafı və rəqiblərin (Zoom, WhatsApp, Google Meet və s.) artması ilə Skype öz əvvəlki populyarlığını tədricən itirdi. Microsoft, son illərdə resurslarını daha çox Teams platformasına yönəldərək Skype-ı ikinci plana keçirdi.

Bir dövr bitir, xatirələr qalır

Skype-ın bağlanması bir çox insan üçün nostalji və emosional hisslər oyadır. Uzaq ölkələrdə olan yaxınlarımızla keçirdiyimiz o uzun videozənglər, ilk dəfə birinin səsini və simasını ekranda görməyin həyəcanı, sevgi dolu mesajlaşmalar artıq tarixə qarışır.

Texnologiya dəyişsə də, Skype-la bağlı xatirələr silinməzdir. O, bir dövr idi – və o dövr indi rəsmi olaraq başa çatır.

✍️"Ulusum".az