Yekaterinburqda saxlanılan azərbaycanlılarla bağlı Rusiya XİN-dən açıqlama

Rusiya Xarici İşlər Nazirliyinin sözçüsü Mariya Zaxarova RBC-yə bildirib ki, Yekaterinburqda azərbaycanlı diaspor nümayəndələrinin saxlanılması əvvəlki illərdə törədilmiş ağır cinayətlərin istintaqı çərçivəsində həyata keçirilib.

“O illərdə baş vermiş ağır cinayətlərlə bağlı aparılan istintaq çərçivəsində Rusiya hüquq-mühafizə orqanları Rusiya vətəndaşları, Azərbaycandan olan şəxslərin yaşadığı ünvanlarda axtarışlar və saxlanmalar həyata keçirib,” – deyə o vurğulayıb.

İyunun 28-də Azərbaycanın Xarici İşlər Nazirliyinə dəvət olunan Rusiyanın müvəqqəti işlər vəkili Pyotr Volokov Azərbaycan tərəfinə izahat verib və “vəziyyətin hüquq-mühafizə orqanlarının nəzarətində olduğunu” bildirib.

Zaxarova əlavə edib ki, bu cinayət işləri üzrə istintaq tədbirləri davam edir və əlavə məlumatlar araşdırma irəlilədikcə İstintaq Komitəsi tərəfindən paylaşılacaq.

Xatırladaq ki, daha əvvəl Bakı azərbaycanlılara qarşı zorakılıqda iştirak edənlərin məsuliyyətə cəlb edilməsini tələb etmişdi. Məlumata görə, onlardan beşi işgəncə nəticəsində həyatını itirib.

Ulusum.az