BMT: Dünya Hindistan-Pakistan qarşıdurmasına tab gətirə bilməz

BMT-nin Baş katibi Antonio Quterreş Hindistan və Pakistan arasında artan gərginliklə bağlı ciddi narahatlığını ifadə edib və hər iki ölkəni maksimum təmkinli olmağa çağırıb.

Bu barədə BMT Baş katibinin rəsmi nümayəndəsi Stefan Düjarrikin yaydığı bəyanatda bildirilir.

“Baş katib Hindistanın sərhəd boyunca həyata keçirdiyi hərbi əməliyyatlardan dərin narahatlıq keçirir. O, vəziyyətin daha da gərginləşməsinin qarşısını almaq üçün Hindistan və Pakistanı hərbi təmkin nümayiş etdirməyə çağırır. Dünya bu iki ölkə arasında hərbi qarşıdurmaya tab gətirə bilməz”, – deyə bəyanatda qeyd olunur.

Xatırladaq ki, Hindistanın Pakistanın Bahavalpur, Kotli və Müzəffərabad şəhərlərinə raket zərbələri endirməsindən sonra rəsmi İslamabad cavab tədbiri olaraq hava məkanını bağlayıb və qırıcı təyyarələrini havaya qaldırıb. Hücum nəticəsində biri uşaq olmaqla azı iki nəfər həyatını itirib, 12 mülki şəxs isə yaralanıb.

✍"Ulusum".az