Trampın ətrafı ona Putinə zəng etməkdən çəkinməyi məsləhət görür

ABŞ prezidenti Donald Trampın yaxın ətrafı ona Ukraynada tam atəşkəsə razılaşana qədər rusiyalı həmkarı Vladimir Putinə zəng etməməyi tövsiyə edir.

“Ulusum”.az xəbər verir ki, bu barədə NBC telekanalı ABŞ administrasiyasının iki rəsmisinə istinadən xəbər verir.

“Onlar dedilər ki, Trampa deyilib ki, Putin Ağ Evə Rusiya-Ukrayna müharibəsində tam atəşkəslə razılaşdığını deməsə, telefon danışığı yaxşı fikir deyil”- məlumatda bildirilir.

Rəsmilər qeyd ediblər ki, cümə axşamına olan məlumata görə, dövlət başçıları arasında telefon danışığı planlaşdırılmayıb. Bununla belə, “administrasiya rəsmiləri xəbərdarlıq ediblər ki, Tramp qəfildən Putinlə danışmaq istədiyinə qərar verə bilər”.

Telekanal xatırladıb ki, Tramp bazar günü NBC telekanalına Putinlə bu həftə danışmağı planlaşdırdığını deyib və Rusiya liderinin “Ukrayna prezidenti Vladimir Zelenskinin istefa verməli olduğunu deməsindən” narazılığını bildirib.

Nəşr onu da bildirir ki, Rusiya Birbaşa İnvestisiya Fondunun rəhbəri, Rusiya prezidentinin xarici ölkələrlə iqtisadi əməkdaşlıq üzrə xüsusi nümayəndəsi Kirill Dmitriyevlə Tramp administrasiyasının nümayəndələri arasında keçirilən görüşdə respublikaçı qanunvericilər də iştirak edib.

NBC-nin verdiyi məlumata görə, görüş iştirakçıları "Ukraynada müharibənin dayandırılması şərtlərini və Putinin atəşkəs tələblərini müzakirə ediblər", üç ABŞ rəsmisi bildirib.