Selfi asılılığının psixoloji təsirləri: Araşdırma

Selfi bu gün sosial həyatın ayrılmaz hissəsinə çevrilib. İnsanlar hər yerdə – səyahətlərdə, restoranlarda, dostlarla görüşdə, hətta idman zalında belə selfi çəkirlər. Bu, təkcə xatirə saxlamaq vasitəsi deyil, həm də özünüifadə formasıdır.

Selfi çəkmək texnologiyanın inkişafı ilə daha əlçatan olub. Müasir smartfonlar yüksək keyfiyyətli kameralar və xüsusi filtrlərlə selfiləri daha cəlbedici etməyə imkan yaradır. Sosial şəbəkələrdə selfilər bəzən şəxsi brendin bir hissəsinə çevrilir, insanın imicini formalaşdırır.



Bununla belə, selfinin həddən artıq istifadəsi psixoloqların diqqətini cəlb edib. Alimlər sosial şəbəkələrdə tez-tez selfi paylaşmağın insanın psixoloji vəziyyətinə təsir edə biləcəyini bildirirlər. Bəzi araşdırmalara görə, selfi insanın özünə inamını artırmaqla yanaşı, bəzən özgüvən problemlərini də göstərə bilər.

Selfi asılılığı, sosial şəbəkələrdə öz şəkillərini daima paylaşma, özünü daha yaxşı göstərmək və başqalarının diqqətini çəkmək istəyindən yaranan bir vəziyyətdir. Bu asılılıq təkcə psixoloji deyil, həm də emosional və sosial sahələri əhatə edir. Selfi çəkmək və onları sosial şəbəkələrdə paylaşmaq, bəzi insanlar üçün tanınma, qəbul edilmə və diqqət cəlb etmənin bir yolu halına gəlir.



İnsanlar selfi çəkməklə özlərini daha yaxşı hiss edə bilər, amma bu, bəzən həddindən artıq hala gələ bilər və ciddi nəticələrə səbəb ola bilər. Selfi asılılığının əlamətləri arasında:



Həddindən artıq şəkil çəkilməsi və sosial şəbəkələrdə paylaşılması,
Öz fiziki görüntüsünü başqalarına göstərmək üçün davamlı olaraq özünü düzəltmək,
Özünü yaxşı hiss etmədiyi hallarda selfi çəkməyə çalışmaq,
Başqalarının bəyəni və şərhlərinə güvənmək,
Selfi çəkmək üçün təhlükəli və ya uyğun olmayan vəziyyətlərə girmə.

Bu asılılıq, insanın özünə inamını zamanla azalda bilər və sosial şəbəkələrdə "bəyənmə" və "şərh" almanın yaratdığı psixoloji təzyiq, insanın real həyatındakı münasibətlərini və hisslərini pozmağa başlaya bilər. Əgər selfi çəkmək çox vaxt, enerjini və hətta insanın psixoloji vəziyyətini əhatə etməyə başlayırsa, bu, asılılığın əlaməti ola bilər.

Bunun qarşısını almaq üçün sağlam sosial şəbəkə istifadə vərdişləri inkişaf etdirmək, özünə güvəni başqalarının şərhlərinə və bəyənmələrinə deyil, öz daxili hisslərinə əsaslandırmaq vacibdir. Selfilərin sadəcə xatirə saxlamaq üçün və ya əyləncə məqsədilə çəkilməsi tövsiyə olunur.

Səidə