Endokrinoloq: Çörək düzgün istifadə olunduqda sağlamlıq üçün faydalı ola bilər

Endokrinoloq Veronika Neudahina bildirib ki, çörək həzm sisteminə pis təsir etmir və bədən çəkisinin artmasına səbəb olmur. O, bu məhsulun zərərli olduğu barədə yayılmış mifləri "Lenta.ru" ilə söhbətində təkzib edib.

Həkim, çörəyin əsas üstünlüklərindən birinin onun tərkibindəki kompleks karbohidratlar olduğunu qeyd edib, bu maddələr orqanizmi uzun müddət enerji ilə təmin edir. Həmçinin, çörək B1, B2, B6 vitaminləri ilə zəngindir, bu vitaminlər sinir sisteminin normal fəaliyyətini təmin edir, eləcə də maqnezium və dəmir ehtiva edir ki, bunlar ürək-damar sisteminin sağlamlığını və qan dövranını dəstəkləyir.

Maksimal fayda əldə etmək üçün endokrinoloq çörəyin əlavə maddələr və şəkər olmadan, təbii tərkibli olanlarını seçməyi tövsiyə edib. Həkim həmçinin, gündə iki normal dilim çörək yeməyin fiziki forma üçün təhlükəsiz olduğunu qeyd edib. Çörəyi xüsusilə qatıq, yumurta, balıq, ət və tərəvəzlə birləşdirmək çox faydalıdır, deyə o əlavə edib.

Neudahina qeyd edib ki, ən faydalı çörək tam buğdadan hazırlanmış çörəkdir, çünki bu, taxılın bütün dəyərli komponentlərini – qabığını, endospermi və toxumu saxlayır. Bu cür çörək, vitaminlərlə və liflə zəngindir, uzun müddət toxluq hissi verir və bağırsaqların fəaliyyətini yaxşılaşdırır.

Bununla yanaşı, belə çörək alarkən onun tərkibinə diqqət yetirmək vacibdir. İlk sırada tam buğda ununun qeyd olunduğuna əmin olmaq lazımdır. Bəzən istehsalçılar məhsulu tam buğdalı olaraq təqdim etsələr də, əslində onun tərkibində adi ağ un üstünlük təşkil edir və tam buğda unu cəmi 1%-i təşkil edir.


Səidə Mustafa