"Həvəskarları bu idman növünə cəlb etmək istəyirik" EKSKLÜZİV

Azərbaycanda ilk dəfə olaraq Körlinq idman növünün təqdimat mərasimi keçirilib.

Ölkəmizdə Qış Olimpiya növünə aid olan Körlinqin bazası qurulur.

Bununla bağlı Ulusum.az saytına özəl olaraq "Ocaq Sport” klubunun rəhbəri Vəfa Bəkirova məlumat verib:

"Hazırda komanda tam şəkildə yığılmayıb, millimizin heyətində cəmi 4 idmançı var. Türkiyədən dəvət olunan 24 yaşlı baş məşqçi Ahmet Alperenin beynəlxalq səviyyədə ciddi uğuru olmasa da, ölkəsində istedadlı məşqçilərdən sayılır".

Klub rəhbərinin sözlərinə görə, bu idman növünün inkişaf istiqamətində planlar hazırlanır: “Körlinq idman növü ölkəmizdə yenidir, həvəskarları bu idman növünə cəlb etmək istəyirik. Böyük hədəflərimiz var, ona görə xaricdən məşqçi dəvət etmişik. Qış Olimpiya Oyunlarının proqramına daxil olan körlinqin Azərbaycanda uğurlu olması üçün ciddi çalışmalıyıq”.

Qeyd edək ki, yeni təyin olunan Türkiyəli baş məşqçi hədəf üçün hələ bir neçə il gözləməli olduğumuzu bildirib.

Ağa Dadaşzadə