Trampla razılaşma? Lavrov deyir: “Əvvəlki səhvləri təkrarlamayacağıq”

Rusiya ABŞ-ın keçmiş prezidenti Donald Trampla elə bir razılaşmanın qarşısını almağı bacarır ki, bu, ölkəni təhlükəli vəziyyətə sala bilər.

Bu barədə Rusiya Xarici İşlər naziri Sergey Lavrov “Kommersant” qəzetinə verdiyi müsahibədə bildirib.

“Ulusum”.az xəbər verir ki, Lavrovun sözlərinə görə, Moskva Vaşinqtondan “normal razılaşmalar” təklifi eşidəndə – bu ifadə müsbət mənada nəzərdə tutulur – bu təklifləri yalnız qarşılıqlı fayda prizmasından qiymətləndirir.

“Biz çox yaxşı anlayırıq ki, qarşılıqlı faydalı razılaşma necə görünür – və biz heç vaxt belə təklifləri rədd etməmişik. Amma eyni zamanda bilirik ki, hansı razılaşma bizi yenidən tələyə sala bilər,” – deyə Lavrov vurğulayıb.

Nazir əlavə edib ki, Trampın siyasi xətti ABŞ maraqlarının qorunması üzərində qurulub. Lakin Trampın yanaşması digər ölkələrin yanaşmaları ilə üst-üstə düşərsə, o, dialoqa hazır olur. Lavrov bu üslubu “praqmatik və diqqətəlayiq” adlandırıb.

Bununla yanaşı, Lavrov Rusiya ilə ABŞ arasında münasibətlərin bərpa olunacağı təqdirdə Moskvanın əvvəlki səhvləri təkrarlamamalı olduğunu bildirib. Onun sözlərinə görə, hazırda Rusiya siyasi elitası Qərbdən asılılığın istənilən formasının qarşısını almağa çalışır – bu, iqtisadiyyat, hərbi sahə, ərzaq təhlükəsizliyi və texnologiyaları da əhatə edir.