Bu gün Ümumdünya Əməyin Mühafizəsi Günü qeyd olunur

Azərbaycanda əməyin mühafizəsi hüququ ilk dəfə 1995-ci ildə qəbul olunan Konstitusiyada təsbit olunub.

Ümummilli Lider Heydər Əliyevin təşəbbüsü ilə bu sahədə hüquqi baza yaradılıb, 1997-ci ildə dövlət nəzarət qurumu təsis edilib, 1999-cu ildə isə yeni Əmək Məcəlləsi qəbul olunub. Prezident İlham Əliyevin rəhbərliyi ilə təhlükəsiz əmək şəraitinin təmin olunması dövlət siyasətinin əsas istiqamətlərindən birinə çevrilib və bu istiqamətdə Azərbaycan Beynəlxalq Əmək Təşkilatının 60-a yaxın Konvensiyasını ratifikasiya edib.

Dövlət Əmək Müfəttişliyi Xidməti iş yerlərində əmək qanunvericiliyinə riayət olunmasına nəzarəti həyata keçirir. Bu il bölgələrdə 400-dən çox işəgötürənin iştirakı ilə maarifləndirmə tədbirləri təşkil olunub, tədbirlərdə əmək qanunvericiliyindəki son dəyişikliklər və yeni standartlar barədə məlumat verilib.

Rəqəmsallaşma və süni intellektin iş mühitinə təsiri əməyin mühafizəsində müasir yanaşmaların tətbiqini zəruri edir. BƏT bu il Ümumdünya Əməyin Mühafizəsi Gününü "Rəqəmsallaşma və süni intellektin iş yerlərinə təsiri" mövzusuna həsr edib.

✍️"Ulusum".az