Şəki: Tarix, Təbiət və Mətbəx İncisi

Şəki — təbiəti, tarixi abidələri, meşələri və çayları ilə Azərbaycanın ən gözəl guşələrindən biridir. UNESCO-nun Ümumdünya İrs Siyahısına daxil edilmiş bu şəhər yalnız qədim memarlığı və tarixi irsi ilə deyil, eyni zamanda zəngin kulinariya ənənələri ilə də tanınır. Tarix boyu karvan yolları üzərində yerləşməsi Şəkiyə mədəniyyətlərarası körpü rolu verib və bu, onun mətbəxində də öz əksini tapıb.

Buna görə də Şəki, həm də ölkəmizin kulinariya və mədəniyyət paytaxtlarından biri sayılır. Burada hazırlanan yeməklər təkcə dad deyil, tarix daşıyır. Turistlərin maraqla dadına baxdığı Şəki paxlavası və piti artıq dünya miqyasında tanınan təamlardır. Lakin bu zəngin mətbəxin xəzinəsində daha az tanınan, lakin bir o qədər dəyərli və qədim yeməklər də var.

Ulusum.az xəbər verir ki, onlardan biri də "Qozlu Dovğa – Kələköş"dür. Bu şorba əsrlərlə Şəki mətbəxində hazırlanıb və nəsildən-nəslə ötürülüb.

Qatıq, düyü, yumurta, qoz, soğan, sarımsaq və nanədən ibarət bu yemək həm dadlı, həm də faydalıdır. Kələköş isti şəkildə süfrəyə verilir və həm yayda, həm də qışda böyük məmnuniyyətlə yeyilir. Bu təam, sadəcə bir yemək deyil — Şəki xalqının həyat tərzini, zövqünü və tarixini əks etdirən mətbəx mirasıdır.

R.Daşdəmirova