Daxili işlər naziri Tovuzda vətəndaş qəbulu və sıra baxışı keçirib

Azərbaycan Respublikasının Prezidenti cənab İlham Əliyevin tapşırığına və bölgələrdə vətəndaşların qəbulu cədvəlinə uyğun olaraq, daxili işlər naziri general-polkovnik Vilayət Eyvazov aprelin 27-də və 28-də Tovuz Rayon Polis Şöbəsində vətəndaş qəbulu keçirib.



Nazir tədbirə başlamazdan əvvəl Tovuz şəhərində ümummilli lider Heydər Əliyevin abidəsini ziyarət edərək xatirəsini ehtiramla yad edib.

Qəbul zamanı Tovuz, Şəmkir, Gədəbəy, Daşkəsən, Qazax, Ağstafa rayonlarından və digər bölgələrdən gələn 153 vətəndaşın müraciəti dinlənilib. Müraciətlərin əksəriyyəti yerində həll edilib, bir sıra məsələlərin araşdırılması və həlli üçün aidiyyəti qurumların rəhbərlərinə müvafiq tapşırıqlar verilib.





Səfər çərçivəsində general-polkovnik V.Eyvazov bölgə üzrə polis orqanlarına xidmətə qəbulla bağlı sıra baxışı da keçirib. Vətən müharibəsi iştirakçısı olan 36 nəfərin də qatıldığı baxış nəticəsində xidmətə qəbul meyarlarına cavab verən 191 nəfər seçim turunun növbəti mərhələsinə buraxılıb.